Pages

17 June 2009

Mary Magdalen, from Speculum Sacerdotale

From the TEAMS Middle English Texts at The Camelot Project comes the following text from the Speculum Sacerdotale:

In syche a day ye schull have the feste of Seynt Marye Magdalene, whiche was the synneful womman and servyd to hure fleschely desires, and to whome God afterward gafe siche grace that sche servyd forgevenes of here synnes.

For when Crist was in the hous of Symon the Leprous, as sone as Marye herde telle of Hym, sche thought in hireself by dyvyne aspiracion and grace that it were then covenable tyme for to converte and make sorowe and penaunce of hure lyf that sche hadde ladde afore. And sche toke an oynement in a vessel and yede into the hous of Symon where Jhesu was and yede to the feet of Jhesu and wasshid hem with here teris of hure yghen and then dide wipe hem with the heeres of hire heed and anoyntyd hem then with hire oynement.

And seeynge Crist that the Pharasye Symon hadde indignacion that Crist lete siche a synful womman come so nye hym, he seide to hym thus: "Symon, sethen I come into thyn hows thou nether kyssid my feet ne wasshid hem ne anoyntid hem, but this womman hath done al this sethen sche come." And therefore seide Crist to Symon, "Propterea dimittuntur ei peccata multa quoniam dilexit multum. Therfore for hure myche love is the multitude of hure synnes forgeven." And then he seide to the womman, "Remittuntur tibi peccata tua quoniam dilexisti me. Woman, for thou hast shewyd to me love, thi synnes are forgeven. Vade, fides tua te salvam fecit. Go, thi feith hath made thee safe."

Joseph telleth us that Marie Magdalein for the grete brennyng love that sche loved God wold never have housbonde ne se man with hire yghen after the ascension of Crist. But sche yede into deserte and there sche dwellyd the space of thirty yere unknowyn to alle maner of men, ne never ete mete of man ne dronke drynke. But in yche tyme and in yche houre when that men worschipid here God, then the aungels of Hevene come to hyre and reysed hure up betwene hem into the eyre, and there sche made hire prayer with hem to God. [
More]

SOURCE: Sherry L. Reames, ed., "
Mary Magdalen, from Speculum Sacerdotale," TEAMS Middle English Texts. Retrieved 17 June 2009. Originally published in Middle English Legends of Women Saints (Kalamazoo, MI: Medieval Institute Publications, 2003).

See also:

Early South English Legendary Life of Mary Magdalen
John Mirk, Sermon on St. Mary Magdalen
Legend of Mary Magdalen, Penitent and Apostle, The

No comments:

Post a Comment